ChatGPT Ads er lansert i Norge

Ein ny annonsekanal er rulla ut i Norge. Førebels er tilgangen avgrensa, men moglegheitene er spennande.

ChatGPT Ads er no ein del av ei større europeisk utrulling. I første omgang skjer annonseringa gjennom OpenAI sitt Ads Solutions-team og utvalde partnarar, før løysinga etter kvart skal opnast for fleire.

For norske bedrifter betyr det at ein heilt ny annonsekanal er på plass. Og vi skal sjølvsagt følgje utviklinga og teste moglegheitene når vi får tilgang.

Kundereisa startar på nye stader

Det siste året har vi sett ei tydeleg endring i korleis vi søkjer etter informasjon. Der Google tidlegare var den naturlege staden å starte, spør stadig fleire ChatGPT og andre AI-verktøy om hjelp.

Vi brukar AI til å undersøkje produkt og tenester, samanlikne alternativ, finne leverandørar og planleggje reiser. Ein større del av researchfasen kan dermed gå føre seg utan at kunden besøker nettsida til bedrifta.

For oss som jobbar med digital marknadsføring, blir det vanskelegare å fange opp potensielle kundar tidleg i kundereisa. Og nettopp derfor blir annonsering i ChatGPT så interessant.

Bli synleg i researchfasen

Slik løysinga er presentert så langt, vil relevante annonsar kunne dukke opp under det organiske svaret frå ChatGPT. Det gir oss moglegheita til å nå potensielle kundar medan dei undersøkjer og samanliknar produkt og tenester.

Det kan bli ein av dei store fordelane med annonsering i AI-verktøy: å bli synleg tidleg i kundereisa, medan kunden framleis vurderer alternativa sine.

Gode promptar blir viktig

Noko av det mest interessante er korleis annonsane skal setjast opp. Her vil gode promptar og relevant innhald spele ei viktig rolle.

Prompten skal mellom anna beskrive produktet eller tenesta, målet med annonsen, målgruppa og kva retningslinjer som skal følgjast. Jo betre informasjon ChatGPT får, desto betre grunnlag har systemet for å forstå når annonsen er relevant.

Det må også vere ein tydeleg raud tråd mellom målgruppe, bodskap og landingsside. I tillegg skal annonsen mellom anna innehalde favicon, produktbilete, overskrift og beskriving.

Korleis fungerer det i praksis?

Vi har framleis ikkje alle svara på korleis annonsering i ChatGPT vil fungere når løysinga blir tilgjengeleg for fleire. Mellom anna står det att å sjå kva moglegheiter vi får for målretting, optimalisering og analyse.

Det vi veit, er at resultata skal kunne sporast ved å kople ei utviding til nettsida. Det vil gi betre innsikt i trafikken og resultata annonsane skaper.

Kundereisa er allereie i endring, og ChatGPT Ads gir oss ein ny måte å bli synlege på. Vi gler oss til å teste, lære og sjå kva rolle denne annonsekanalen får framover.

Har du spørsmål om dette, må du gjerne ta kontakt med meg på emilie@gasta.no.